Bu postu yeni online mağaza açmaq istəyənlər və mövcud onlayn mağazada problemlər ilə qarşılaşanlar üçün yazmağı qərara aldım. Həyatınızda ilk dəfə e-ticarətə başlayıb, onlayn mağazanıza yaxşı ziyarətçi trafiki qazanmaq istəyirsinizsə bu yazını mütləq oxuyun.
Onlayn mağazada problemlər var? – Həll yolu Hotjar!
Bilirsiz ki, hər zaman bildiklərimi və təcrübələrimi e-ticarətin müxtəlif növləri ilə məşğul olmaq istəyənlər ilə paylaşmağa çalışıram. Lakin paylaşdığım bütün məqalələri oxuyub, yazdıqlarımın hamısına riayət etsəz də heç kim sizə onlayn mağazanızın saat kimi düzgün işləyəcəyinə zəmanət verə bilməz. Problemlər mütləq olacaq. Ağır yüklənmə, şablonların yaxşı işləməməsi və s. hamısı satışa mənfi təsir edə bilər. Bu isə heç kimin xoşuna gəlmir. Bəzən olur ki, siz tərəfdə mağazada heç bir problem görünmür amma müştəri bəzi problemlərlə qarşılaşır.
Məsələn, mən öz satış saytımda belə bir problemlə qarşılaşmışdım. Bir plugin quraşdırmışdım ki, bu plugin mənim yayımladığım hər yeni məhsul üçün öz məhsul səhifəsini istifadə edirdi. Nəticədə də müştəri səbətə məhsul əlavə etdikdə sifariş səbətdə ikiqat qeyd edilirdi. Bu, bir az qarışıqlıq yaradırdı. Müştəri məhsulu almaq üçün səbətdə məhsulun birini silməli olurdu. Bir çox hallarda müştərilər buna vaxt sərf etməyib, alış etmədən çıxıb gedirdilər.
Bir gün satdığım məhsulların statistikasını yoxlayanda alış səviyyəsinin aşağı olduğunu gördüm. İnternetdə bir az araşdırma etdikdən sonra Hotjar alətini yoxlamağa qərar verdim. Hotjar müştərilərin davranışını ölçə bilən bir alətdir.
Təsəvvür edin, video qeydə alır hər şeyi. Müştərinin sayta daxil olmasını, saytda etdiyi bütün klikləri, və harda artıq problem yaşayır alış verişi dayandırır. Saytınıza elə bilin ki, kamera quraşdırmısız, sayta daxil olanları izləyirsiniz.
Bunun sayəsində 5 dəq ərzində müştərilərlə aramda olan problemi həll etdim. Mən Hotjar barədə öyrənməsəydim, mağazamda olan problemdən xəbərim olmayacaqdı. Təsəvvür edin ki, sizin də səbətlə bağlı və ya digər bir probleminiz var, bu problem birbaşa satışlarınıza təsir edir və sizin ondan heç xəbəriniz də yoxdur.
Belə problemlərin qarşısını almaq üçün məsləhət görürəm ki, pulunuzu havaya atmadan Hotjar-ın yeni başlayanlar üçün pulsuz olan başlanğıc tarif planını yoxlayasız.
Bu tarif planı gündəlik 2000 baxış, 300 qeydiyyat (ziyarətçilərin kliklərini, mausun hərəkətini göstərən və s.) aparır, online mağazada mövcud olan bütün problemləri göstərir. Pulsuz olan planda yeni qeydiyyatları görmək üçün köhnələri silməli olsaz da müştərilərinizin ən son davranışlarını izləyə biləcəksiniz. Amma mağazanızın ziyarətçiləri həddən artıq çoxdursa, plus tarif planını seçmək sizin üçün daha yaxşı olar.
Bu bir reklam yazısı deyil, sadəcə özümə borc bildim bu məlumatı sizinlə bölüşməyi.
Online bizneslər, internetdə pul qazanmağın effektli yolları barədə məlumatlı olmaq və yeni biliklər əldə etmək üçün bloqumu izləməyi unutmayın.
