Bəzən 24 saat işlərimizi görməyə kifayət etmir. Bilərəkdən işləri təxirə salmaq, diqqət yayındıran məsələlər, işə lazımından artıq vaxt sərf etmələr zamanın qızıla bərabər olduğu dövrdə bizim onu boşuna sərf etməyimizə gətirir çıxarır. Nəticədə Əli aşından da oluruq, Vəli aşından da. Yəni vaxtımız da gedir, məqsədlərimiz də bizə uzaqdan baxa-baxa qalır. Belə hallarda köməyimizə vaxtın idarə edilməsi üzrə hazırlanan tətbiqlər çata bilər. Bugünkü yazımda sizə öz hazırladığım Smart Sloth da daxil olmaqla 6 ən yaxşı və ən effektiv hesab etdiyim zamanın idarəedilməsi tətbiqləri barədə danışacağam.
Smart Sloth
Hələ ki sadəcə İOS versiyası mövcuddur.
Zamanın idarə edilməsi ilə bağlı özüm də daxil olmaqla bir çox insanların qarşılaşdığı problemlər həmişə məni düşündürüb. Amma funksionallığı tam istəklərimə uyğun olan birini tapmadığıma görə özüm bir app yaratmaq qərarına gəldim. Smart Sloth sayəsində siz işlərinizi effektiv şəkildə sahmana salacaq, zamanınızı düzgün idarə edəcək, daha çox iş görüb, məqsədlərinizə daha rahat çata biləcəksiniz. Yaratdığım tətbiq aşağıdakı funksionallıqlara malikdir:
- Hər tapşırıq üçün müddət təyini
- Müddət bitdikdə bildirişlər
- Sadə idarəetmə paneli
- Bildirişləri tərk etmədən tapşırıqlara göz atmaq imkanı
- Özəlləşdirmə imkanları
- Apple ağıllı saatınızla inteqrasiya olunur.
Diqqətinizi gücləndirmək, təxirəsalmağı kənara qoymaq, perfeksionizmə qalib gəlmək, şəxsi həyat-iş rejimi balansını yaratmaq, böyük tapşırıqların öhdəsindən gəlmək və gedən vaxtın daha çox fərqində olmaq istəyirsizsə, Smart Sloth axtardığınız mobil proqramdır.
Dostlar, proqramı bəyənsəniz 5 ulduz verib yaxşı rəy yazmağı unutmayın 😉
Shift
Əgər bir neçə email hesabınız varsa və fərqli layihələriniz fərqli email-lərə bağlıdırsa, Shift onları idarə etməyə sizə yardım edəcək. Artıq müxtəlif ünvanlara gələn email-lərə nəzarət etmək üçün giriş-çıxış etməyə ehtiyac yoxdur. Bir kliklə bir email-dən digərinə keçib işlərinizə daha çox fokuslana bilərsiniz.
Shift Trello, Calendly, Airbnb kimi app-lərlə də inteqrasiya oluna bilir.
Shift-in əsas paketi pulsuzdur və Mac kompüterlərində istifadə etmək mümkündür. Tətbiqin daha çox funksiyalarından istifadə etmək üçün illik 29.99$-lıq və ya daha geniş paket seçib illik 99.99 $-lıq Pro plana keçə bilərsiniz.
RescueTime
Adından da təxmin etdiyiniz kimi RescueTime internetdə nə qədər vaxt keçirdiyinizi izləyən app-dir. Vaxtını nəyə itirdiyini bilmək istəyənlər üçün əla bir proqramdır. Belə ki, o, gün ərzində girdiyiniz saytları, sosial mediada itirdiyiniz vaxtı və hətta istifadə etdiyiniz app-ləri qeyd edir. RescueTime müəyyən bir işə uzun müddət sərf etdikdə də sizə bildiriş göndərir ki, özünüzə nəzarət edib, işə sərf etdiyiniz saatların fərqində olasınız.
İnkişafınızı izləmək üçün burada dəqiq hesabatları və gündəlik diqqətçəkən məqamları görə biləcəksiniz. Vaxtı boş yerə sərf etdiyinizi biləndə diqqət yayındıran vasitələri aradan qaldıracaq və daha məhsuldar olacaqsınız.
RescueTime-ın Premium paketinə qoşulsanız, sizin işinizə mane olan saytlar müvəqqəti olaraq bloklanacaq. RescueTime iOS, Android, OS X, Windows, Linux platformaları üçün hazırlanıb. O, tamamilə pulsuz olsa da, premium planlarını aylıq 9$, illik isə 72$ ödəməklə əldə edə bilərsiniz.
Trello
Trello playstore-dakı məhsuldarlıqla bağlı ən məşhur mobil tətbiqlərdən biridir. Bu dinamik layihə idarəetmə tətbiqi vasitəsilə kolleqalarınızla birgə işlər görə və görülməli olan işlərinizi qaydasına qoya bilərsiz.
İşləmə qaydası: özünüzün və komanda yoldaşınızın layihələri rəqəmsal lövhədə siyahı şəklində görünür. Bu siyahıdakı layihələrin hər birinin içində fərdi postlar olur. Həmin postlara hədəflərinizi, ideya və tapşırıqlarınızı, qısacası komanda yoldaşlarınızla nələri paylaşmaq istəyirsizsə daxil edirsiniz. Komanda yoldaşlarınız isə öz növbələrində həmin tapşırıqlara şərh yaza, qoşmalar əlavə edə bilir.
Trello iOS, Android, Mac, Windows platformalarında işləyir.
İstifadəçilər ondan tamamilə pulsuz yararlana bilsə də, Trello eyni zamanda Business Class və ya Enterprise hesabları da təqdim edir.
Asana
Asana gündəlik fəaliyyətləri izləmək üçün çox əla bir proqramdır. Xüsusən Satış nümayəndələri ondan daha çox istifadə edirlər. Bu tətbiq vasitəsilə satış nümayəndələri mövcud və potensial müştəriləri idarə edir, o cümlədən də komandanın digər üzvləri ilə əməkdaşlıq edə bilirlər.
Asana iOS, Android və Windows üçün nəzərdə tutulub.
Başlanğıc plan tamamilə pulsuz olsa da, Premium plan üçün istifadəçi aylıq 9.99$ ödəməlidir. Business paketi isə hər istifadəçi üçün aylıq 19.99$-dır.
Todoist
Todoist cədvəlinizi idarə etmək üçün güclü alətlərdən biridir. Bu təqvim app-i vasitəsilə siz həm planlarınızı izləyə, həm də təkrarlanan tapşırıqları, işlərin son təhvil tarixini əlavə edə bilərsiz. Bundan başqa hansı işlərin daha vacib, hansıların ikinci dərəcəli olduğunu qeyd etmək üçün rənglərdən də istifadə edə bilərsiniz. App-da hazır şablonlar olduğuna görə istifadəçilər hər dəfə sıfırdan plan qurmalı olmur. Todoist digər tətbiqlərə də inteqrasiya oluna bilir. Istifadəçilərinin motivasiyasını yüksəltmək məqsədilə hər dəfə tapşırığı vaxtında yerinə yetirdikdə Todoist onlara karma xalları verir.
Todoist Android, iOS, Mac və Windows ilə inteqrasiya olunur, bundan başqa müxtəlif internet brauzerlərində əlavələr şəklidə mövcuddur.
Todoist-in həm ödənişsiz, həm də ödənişli versiyaları var. Ən ucuz plan bir istifadəçi üçün aylıq 3$-dan, Biznes hesabları isə aylıq 5$-dan başlayır.
Vaxtını səmərəli istifadə etmədikdə adam elə bil bütün həyatını işləməklə keçirir. Yuxarıdakı tətbiqlərdən birini seçib, istifadə etməklə ümumi məhsuldarlığı yüksəltmək və iş-şəxsi həyat balansını normaya gətirmək mümkündür.
Yazının sizə faydalı olduğunu düşünürsünüzsə bloqumu izləməyi unutmayın.
Her zamanki kimi mohtesem bir post hazirlamisiniz.Davami gelsin:-)