Ferrarisini satan Rahib kitabının müəllifi məhşur yazar Robin Sharmanın Uğurlu olmağın Sirri kursunu bitirdikdən sonra öyrəndiyim ən önəmli məqamlardan biri səhər saat 5-də yuxudan oyanmağın nə qədər faydalı və məhsuldar olması idi. Kursu bitirdikdən dərhal sonra 1 ay ərzində hər gün səhər saat 5-də oyanmağa qərar verdim. Səhər 5-də oyandığımda sanki günün ilk qələbəsini qazanmış kimi hiss edirdim özümü. Hər kəsdən daha tez günə başlamaq insanı şüur altında uğur qazanmağa kökləyir. 

Çoxumuz ehtiyac olandan da çox yatırıq. Normal adam gün ərzində cəmi 6 saat yatmaqla tam sağlam qala bilər. Yatmaq vərdişdən başqa bir şey deyil. Başqa vərdişlər kimi, sən istədiyin nəticəni əldə edə bilərsən. Buna isə az yatmaqla vərdiş etmək olar. Çoxunuz deyəcəksiz ki, mən tez duranda özümü çox halsız hiss edirəm. İlk bir neçə gün təbii ki, özünüzü yorğun hiss edəcəksiniz. Bu normal haldır. Mən özüm təzə-təzə öyrəşəndə yatmadan öncə gözümü yuxu maskası ilə bağlayırdım və əlavə olaraq 3mg Melatonin qəbul edirdim ki, yatdığım az müddətdə daha çox dərin yuxuda olum. 4 saat yuxu yatsam belə oyananda özümü tam gümrah hiss edirdim. Dostlar, bunu uzunmüddətli məqsədin yolunda qarşınıza çıxan qısamüddətli çətinlik hesab edin. Hal-hazırda sleep cycle mobil tətbiqindən istifadə edirəm və proqram məni dərin yuxuda olmadığım vaxtlar oyadır və oyanarkən heç bir narahatlıq hiss etmirəm. 

Nəyisə vərdişə çevirmək istəyərkən həmişə narahatlıq hiss edəcəksən.Bu, təzə ayaqqabıya öyrəşmək kimidir. İlk günlər bir az narahat olursan, sonra isə qutu qapağı kimi oturur ayağına.

Saat 5-də oyandıqdan sonra 10 dəqiqə ərzində meditasiya edirəm.

meditasiya

Meditasiyanın nə olduğunu bilməyənlər üçün qeyd edim ki, şəkildə gördüyünüz formada əyləşib diqqətinizi yalnız nəfəsinizə cəmləyirsiniz. Düzgün nəfəs almaq düzgün yaşamaqdır. Həmin vaxt beyninizə min cür fərqli fikirlər gələ bilir, amma çalışın yenidən diqqətinizi sadəcə nəfəs almağınıza cəmləyəsiniz.

Meditasiyaya yeni başlayanlar üçün Headspace mobil tətbiqini məsləhət görürəm. Headspace mobil tətbiqi ilə daha rahat meditasiya edə biləcəksiniz. 

Meditasiyanı bitirdikdən sonra sahib olduğum hər şey üçün şükr edirəm və özümə səhər yeməyi hazırlayıram. Səhər yeməyində əsasən 2 yumurtanın ağını yeyirəm və ya kokteyl hazırlayıram. Kokteylin tərkibində kəsmik,banan,meyvə yoqurtu,süd olur. Bəzən kokteylə kreatin qatıram, bu mənə həm enerji verir həm də işləyərkən daha yaxşı fokuslanmağa kömək edir. 

Yemək yeyərkən əhval ruhiyyəmi qaldıran musiqiləri dinləyirəm və saat 6:30 -a kimi günlük planımın bir də üzərindən keçirəm. 

6:30-dan etibarən evdən çıxıram və piyada idmana gedirəm. Hər gün səhər saat 7-dən 9-a kimi idmanda oluram və idmanı bitirdikdən sonra 5 dəqiqə ərzində soyuq duş qəbul edirəm. Səhərlər soyuq duş qəbul etməyin sağlamlığa çox faydası var və günə produktiv başlamağa kömək edir. 

9-dan etibarən ofisdə oluram və gecədən hazırladığım günlük iş planıma uyğun işləyirəm. Nahar vaxtı özümü doydurmamaq şərtilə yemək yeyirəm və axşam saat 5-ə kimi işdə oluram.