Instagram şəbəkəsi çox qısa müddətdə 1 milyarddan artıq istifadəçi qazandı, adi şəkil paylaşma şəbəkəsindən güclü marketinq alətinə çevrildi. Instagram Biznesin hesabatına görə insanların 60%-i bu platformadan yeni məhsullar tapmaq məqsədilə istifadə edir, 80%-i ən azı bir markanı izləyir, 200 milyon hesab hər gün ən azı bir biznes profilini ziyarət edir, 66% ziyarət isə səhifənin izləyicisi olmayan insanlardan gəlir. Beləliklə, əgər Instagram-da pul qazanmaq istəyirsinizsə sizə sadəcə düzgün biznes modeli qurmaq lazımdır.
Rəqabətin yüksək olduğu dövrdə Instagram-da pul qazanmağın 9 üsulunu sizinlə bölüşmək istəyirəm.
Sponsor postları paylaşmaq
Influenser marketinq ən güclü marketinq alətlərindən hesab olunur. İnsanlar şirkətlərdənsə digər istifadəçilərin məsləhətlərinə daha çox güvənirlər. Buna görə də böyük şirkətlər influenserlərin xidmətindən istifadə edir.
Sponsor postları paylaşmaq üçün böyük izləyici kütləsinin olması vacib deyil. Vacib olan həmin kütlənin sizin postlarınızla nə qədər maraqlandığıdır. Təcrübələr göstərir ki, 1000-dən aşağı kütləsi olan bir influenserin izləyiciləri aktivdirsə, sponsor məhsulunu yaxşı reklam edə bilir.
Markanın təmsilçisi olmaq
Bir çox şirkətlər markalarını davamlı təbliğ edəcək birini axtarırlar. Belə bir şəxsi tapdıqda onlar təbliğat üçün öz məhsullarından həmin şəxsə hədiyyə də göndərirlər. Bir çox gözəllik bloggerləri buna misaldır. Onlar müəyyən bir brendin məhsullarını pulsuz əldə edir, qarşılığında isə məhsulları izləyicilərinə nümayiş etdirirlər.
Affiliate linkləri təbliğ etmək
Instagram-da pul qazanmaq üçün Affiliate marketinqdən də istifadə etmək olar. Bu zaman affiliate proqramlara qoşulub, linkləri Instagram səhifəsinə əlavə etmək lazımdır. Bu yolla hər satışdan komissiyalar əldə edə biləcəksiniz.
Affiliate şəbəkələr: Shareasale, Clickbank, Awin.
Bu şəbəkələrdə başqa fərdi affiliate proqramları da var. Belə proqramları Google-da axtarış verərək tapmaq lazımdır. Linki isə Instagram-ın bio hissəsində yerləşdirmək yaxşı olar. Niyə məhz bio? Çünki postların altında yerləşdirilən linklərin üzərinə kliklədikdə birbaşa sayta yönlənmir. Oxucu sayta getmək üçün həmin linki kopyalayıb, brauzerə yerləşdirməli olur. Bio hissəsində isə linkin üzərinə kliklədikdə oxucu birbaşa sayta yönləndirilir.
Affiliate marketinq barədə daha öncəki postlarımda məlumat vermişəm. Maraqlı gələrsə əlavə material kimi oxuya bilərsiniz.
Məhsul satmaq
Instagram hesabından məhsullar satmaq bir az çətin olduğuna görə hansısa e-ticarət portalı (Shopif, Etsy və s.) hesabınıza Instagram-dan keçid vermək məntiqli olar. Instagramdan bu portallara link verdikdə səhifənizə marağı olan istifadəçilər yerləşdirdiyiniz linkə keçid edib, satdığınız məhsullarla da maraqlana bilər. Nə satmağınızdan asılı olmayaraq Instagramda həmin məhsulun alıcısı mütləq olacaq. Çünki Instagramda ucuz kosmetikalardan tutmuş bahalı maşınlara, evlərə qədər hər şey satılır.
Instagram-da pul qazanmaq üçün dropshipping biznesinə də başlamaq olar. Bu zaman siz Instagram hesabınızdan online mağazanıza link verməlisiniz. Dropshippping barədə daha ətraflı məlumatı elə bloqumdan ala bilərsiniz.
Dropshipping biznesi nədir və necə başlamaq olar?
Dropshipping biznesi üçün pulsuz trafik axını
Dropshipping üçün trend məhsul
Satış üçün vizual kontent
Bu gün müştərilər digər istifadəçilərin məhsul barəsindəki rəylərinə fikir verirlər. Buna görə də çox vaxt şirkətlər müştərilərinin onlar barəsindəki müsbət rəylərini izləyiciləri ilə paylaşırlar. Məsələn, turizm şirkətləri real səyahətçiləri ölkələrinə dəvət edib pulsuz yaşayış və ödəniş qarşılığında onlardan öz təəssüratlarını bölüşməklərini istəyirlər. Aşağıdakı birinci şəkli səyahətçi, digərini isə turizm şirkəti paylaşıb.
Amma Instagram-da pul qazanmaq üçün bu üsuldan istifadə etmək istəsəz, gərək sizin böyük izləyici kütləniz olsun.
Sosial media marketing xidmətləri
Instagram-da satış rəqabəti gücləndikcə markaların peşəkar SMM xidmətlərinə ehtiyacı artır. Bu xidmətlərə sosial media marketing strategiyaları, konsultasiyalar, təlimatlar daxildir. Deməli, sosial media mütəxəssislərinin Instagram-da pul qazanmaq və biznes qurmaq şansları böyükdür.
Şirkətlər üçün kontent yaratmaq
Böyük brendlərin kontent mütəxəssisləri olsa da, kiçik şirkətlər adətən frilanserlərin xidmətlərindən istifadə edir. Əgər yaxşı kontent yazmaq bacarığınız varsa, bu bacarığı portfolio kimi istifadə etmək, Instagram-da kreativ kontentlər paylaşmaq lazımdır. Bundan sonra Freelancer, Upwork kimi məşhur frilans online iş portallarında yüzlərlə iş təklifləri tapmaq olar.
Storilər üçün maska və filterlər yaratmaq
Gün ərzində milyonlarla insan Instagram storilərini izləyir. Bu kontent qısamüddətli paylaşım olduğuna görə insanların ona marağı böyük olur. Şirkətlər məhsullarını reklam etmək üçün Instagram storilərində maska və filterlər yaradırlar. Belə filter və maskaları yaratmaq üçün Spark AR Studio-dan istifadə etmək olar. Maska və filterləri yaratmaq kreativliyinizi nümayiş etdirir və Instagram-da pul qazanmaq üçün sizə şans yaradır.
Frilans işlərin təbliği
Əgər frilans işlər görürsünüzsə, Instagram hesabını biznes məqsədli istifadə etmək olar. Bu zaman izləyicilər də başa düşür ki, sizin Instagram-dan istifadə məqsədiniz müştəri tapmaqdır. Bu barədə bio hissəsində də məlumat verə bilərsiniz. Beləliklə, səhifə həm sizin portfolionuza çevriləcək, həm də digər şirkətləri cəlb edəcək.
Instagram-da nə qədər pul qazanmaq olar?
Gəlir əsasən izləyici sayından, fəallığından və səhifənin böyümə potensialından asılıdır. Klik və posta baxış sayı hələ heç nə demək deyil. Əsas məsələ istifadəçilərin həmin postlara marağı və reaksiyasıdır.
Online biznes modelləri və internetdə pul qazanmağın yolları barədə daha ətraflı məlumat almaq üçün bloqumu və Instagram səhifəmi izləməyi unutmayın.
