Sahibkarsız və öz biznesini genişləndirmək istəyirsizsə, məhsul və ya xidmətlərinizi düzgün təqdim edə bilməlisiniz. Bu yolda çətin sınaqlarla qarşılaşacaqsınız, amma Growth hacking strategiyalarından istifadə etməklə bütün sınaqlardan keçib, qarşınıza qoyduğunuz hədəflərə çata bilərsiniz.
Məhsullarını daha kütləvi auditoriyaya çatdıra bilmək üçün sahibkarlar fərqli growth hacking strategiyaları tətbiq etməlidirlər. Bu texnikalar arasında bəziləri cəmi bir neçə ildir yaransa da, müasir dövrdə biznesin inkişafında böyük rol oynayır.
Bu gün sahibkarlar müxtəlif növ growth hack-lər axtarır və gəlirlərini artırmaq üçün milyonlarla müştəri toplamaq və böyümək istəyir. Growth hacking-ə aid ideyalar biznesin uğurlu olması üçün təsdiq olunmuş elementlərdəndir. Lakin hər biznes də marketinqə aid bu growth hack-ləri yaxşı tətbiq edə bilmir. Bir çox sahibkarlar isə bizneslərini genişləndirmək üçün bu strategiyalardan istifadə edərək səmərəli nəticələr əldə edirlər. Düşünürəm ki, sizin də onlardan istifadə etməyinizin vaxtı gəlib çatıb.
Growth hacking strategiyalarını nəzərdən keçirin:
1. Growth hacking nədir?
2. Riayət etməli olduğunuz growth hacking strategiyaları
- Məhsulu istifadəyə verməmişdən qabaq e-mail siyahısı hazırlayın
- Məhsulu Product Hunt-da istifadəyə verin
- Tövsiyə marketinqindən istifadə edin
- Digər markalarla tərəfdaşlıq edin
- Tədbirlərə qoşulun
- Qonşu bazarlardan istifadə edin
- Sosial mediada izləyici kütləsi yaradın
- Rəqibləri izləyin
- Kontent strategiyası yaradın
- Qonaq kimi paylaşımlar edin
- İnfluenserlərlə birgə çalışın
- Trendlə yanaşı addımlayın
- KİV imkanlarından yararlanmaq üçün HARO-dan istifadə edin
- Müştərilərinizə hədiyyə göndərin
3. Əlavə Growth Hack strategiyaları
4. Growth hacking-ə aid nümunələr
Growth hacking nədir?
Bu sözün saysız-hesabsız tərifləri var. Biznesi böyütməyin ən effektiv vasitələrindən sayılan Growth hacking təcrübə əsaslı texnikadır. Bu prosesə marketinqin müxtəlif sahələri, proqramlaşdırma, dizayn, psixologiya, məlumat və analitika daxildir.
Bu texnika ona görə Growth hacking adlanır ki, onun yaradıcısı biznesi böyütmək üçün ənənəvi proseslər əvəzinə tez, sərfəli, eyni zamanda da innovativ metodlara riayət edir.
Growth Hacker kimdir?
Growth hacker ağıllı, orijinal və innovativ bir insandır. Onun əsas hədəfi biznesinə istədiyi qədər müştəri gətirmək, eyni zamanda onları daimi müştəriyə çevirmək üçün kreativ və səmərəli strategiyalardan istifadə etməkdir.
Growth hacker hədəfinə çatmaq üçün məzmun marketinqi, viral marketinq, email marketinq, SEO, A/B sınaqları və s.kimi metodların kombinasiyasından istifadə edə bilər. Lakin yadda saxlamalısınız ki, Growth hacker Growth (inkişaf üzrə) marketoloq ola bilər, amma heç vaxt ona sadəcə marketoloq deyilə bilməz.
Growth hacker aşağıdakı formula ciddi surətdə əməl edir:
Məhsul + İnkişaf = Təsir
Hər bir startup-ın riayət etməli olduğu growth hacking strategiyaları
Yeni üfüqlərə yelkən açmaq, gəlirlərinizi və potensialınızı kəskin surətdə artırmaq üçün biznesin inkişafı üzrə aşağıdakı strategiyalardan istifadə etməlisiniz.
#1 Məhsulu istifadəyə verməmişdən qabaq e-mail siyahısı hazırlayın
Startapın səmərəli inkişafı strategiyasına gəldikdə e-mail marketinq həm potensial, həm də real müştəri tapmaq baxımından ən yaxşı strategiya olaraq qalır.
Fikrinizi e-mail siyahısı hazırlamağa cəmləyin. Bu, auditoriyaya mesajınızı daha effektiv surətdə çatdırmaq üçün sizə imkan yaradacaq. Bundan əlavə, e-mail marketinq istənilən bir məhsulun və ya tədbirin təqdimatından öncə reklam xarakterli məlumat göndərilməsi zamanı bizneslərə çox kömək edir.
E-mail marketinq sizə məhsulu istifadəyə verməmişdən öncə də potensial müştəri qazanmağa imkan verir. Lakin sadəcə e-mail siyahısı hazırlayıb oturub gözləmək olmaz. Siz məlumat xarakterli reklamınızı bir neçə həftə ərzində hazırlamalı və çalışmalısınız ki, auditoriyanız məhsulun istifadəyə veriləcəyi zamanı həvəslə gözləsin.
E-mail siyahısını quraşdırmaq üçün GetResponse kimi e-mail servislərindən birini seçirsiz. Belə servislər e-mail-ləri effektiv şəkildə sizin auditoriyanıza çatdıracaq. Ünsiyyət müştərini saxlamaqda vacib rol oynadığına görə məhsulu istifadəyə verməzdən öncə ən azı həftədə bir dəfə potensial müştərilərinizlə ünsiyyətdə olun.
#2 Məhsulunuzu Product hunt və ya oxşar platformalarda istifadəyə verin
Hər həftə onlarla startap Product hunt kimi platformalarda istifadəyə verilir. Belə platformalar mesajınızı yeni auditoriyaya çatdırmağa imkan yaradır. Sizə məsləhət gördüyüm Product hunt biznesinizi qlobal auditoriyaya təqdim etmək üçün bazarda lider olaraq qalır. Bu platformanı bir sıra innovatorların və jurnalistlərin diqqətini sizin məhsulunuza yönəldən “qızıl bilet” hesab edə bilərsiz. Burada siz izləyicilərdən reaksiyalar və yeni imkanlar üçün ideyalar əldə edəcəksiniz.
Mən də öz startaplarımda ilkin platforma kimi Product Hunt-ı istifadə etmişəm.
#3 Tövsiyə (referral) marketinqindən istifadə edin
Dostların, ailənin və ya sahə üzrə influenserlərin tövsiyəsi başqa vasitələrlə müqayisədə biznesə daha çox müştəri cəlb edir. Tövsiyə vasitəsilə gələn müştərilər sizə xərclərinizi azaltmağa imkan verəcək.
Belə müştərilər şirkətə daha sadiq qalır və 16% daha çox gəlir gətirir. Bundan başqa, tövsiyə proqramlarına malik satış üzrə mütəxəssislər 4-6 dəfə daha çox qazanc əldə edir.
Uber öz biznesinə başlayanda gediş haqlarını paylaşmaq strategiyasını həyata keçirdi. Onlar marka tanıtımı və istifadəçiləri cəlb etmək məqsədilə tövsiyə marketinqindən istifadə etdilər. Bu, çox sadə bir ideya idi: istifadəçinin təqdim etdiyi şifrədən istifadə edən hər növbəti istifadəçiyə görə Uber 5$ gediş haqqı qazandırırdı. Bu ideya o qədər uğurlu oldu ki, indiyə qədər hələ də bütün taksi tətbiqləri ondan istifadə edir.
#4 Digər markalarla tərəfdaşlıq edin
Biznes tərəfdaşlıqlar və əməkdaşlıqlar çox “səs-küy”ə səbəb olduğuna görə ən yaxşı Growth hacking texnikalarındandır. Bir sıra markalar dərk edib ki, birgə marketinq və məhsul tərəfdaşlığı effektiv Growth hacking strategiyasıdır.
Belə tərəfdaşlıqlar təkcə sosial mediada “səs-küy” salmaqla kifayətlənmir, həm də vebsaytınızın orqanik trafikini artırır. Bununla siz xəbər başlıqlarında manşet xəbərə çevrilə bilər, o cümlədən məhsulunuzun və xidmətlərinizin qlobal bazarda məhşurluğunu artıra bilərsiniz.
Yaxşı qazancları olan ən uğurlu tərəfdaşlardan bəziləri bir mövzu ətrafında yeni məhsullar yaradıblar. İstənilən kiçik və orta şirkətlər öz markasına dəyər qatacaq düzgün tərəfdaş taparsa, yaxşı əməkdaşlıq əlaqələri yarada bilər.
Tərəfdaşlıq etmək hətta tamamilə müxtəlif sahələrdə fəaliyyət göstərən bizneslər üçün də işə yarayır. Buna yaxşı bir misal kimi Flipboard (xəbər tətbiqi) və AirBnb (ev kirayəsi)-nin tərəfdaşlığını göstərə bilərik. Bir markanın istifadəçiləri digərinin imkanlarından da yararlana bilir.
Flipboard Airbnb-nin istifadəçilərinə özəlləşdirilmiş kontent təklif edir. İstifadəçi Airbnb-dən ev kiralamaq istədikdə, istəyinə uyğun məlumatlar əldə edir. Məsələyə digər tərəfdən baxdıqda, bu istifadəçilər özləri də kontent yaradır (şərhlər və qiymətləndirmə şəklində) və Flipboard da öz istifadəçiləri üçün bu məlumatlardan yararlanır.
#5 Tədbirlərə qoşulun
Yeni yaradılan bizneslərin 30%-i 24 aydan artıq davam gətirə bilmir. Sahibkarlar bu statistika üzərində ciddi düşünməlidir. Yaxşı Startap tədbirlərinə qatılaraq biznesinizin batmaması üçün vasitələr və ideyalar qazana bilərsiniz.
Davam edin, ən yaxşılardan öyrənin, əlaqələr qurun, öz sahəniz barədə öyrənin və motivasiya əldə edin.
Bu halda itirəcəyiniz heç nə yoxdur. Öz biznesinizi müvafiq biznes tədbirlərində və konfranslarında təqdim etməklə müvəffəqiyyətə daha asan nail ola bilərsiniz.
#6 Qonşu bazarlardan istifadə edin
Qonşu bazarlar (Adjacent Markets) satış üçün əla Growth hack-lərdən biridir. Qonşu bazar dedikdə sizin gördüyünüz işə yaxın işlərin bazarı nəzərdə tutulur.
Qonşu bazarlara siz məhsul və xidmətlərinizlə deyil, bacarıq və biliklərinizlə gedirsiniz. Bu bazar sizdən əsas bacarıqlarınızı götürür və yeni müştərilər üçün yeni dəyərlər yaradır.
Hər hansı yeni bazarı qiymətləndirməmişdən öncə bəzi faktorları nəzərə almalısınız.
- Rəqabət necədir?
- Həcm və xeyir gətirməsi baxımından imkanlar nə qədərdir?
- Aşmalı olduğunuz hüquqi əngəllər var?
Bundan sonra öz bacarıqlarınızı və mövcud kanalları nəzərdən keçirirsiz. Bu bacarıqları istifadə etmək üçün yeni üsullar tapır, beləliklə də satışın inkişafı üçün yeni imkanlara gedən yolları açırsız.
Məsələn, Nike adətən beyində yüngül atletika sahəsi üzrə idman məhsulları ilə assosiasiya olunur. Lakin Nike məhsulları demək olar bütün idman növlərini əhatə edir.
Nike rəqib olan dağçılıq məhsulları bazarına daxil olmaq istədikdə Qonşu Bazar prinsipini meydana çıxardı. Onlar dağçılıq fəaliyyətləri üçün ayaqqabı təklif etməyə başladılar. Müştəri sadiqliyi əldə etdikdən sonra isə geyim sahəsində uğur qazanmağa başladılar.
#7 Sosial mediada öz markanız ətrafında izləyici kütləsi yaradın
Sosial media bizneslər üçün marketinqin əsas sahələrindən biridir. Siz özünüzü təbliğ etmək, reaksiyalar almaq və sahə üzrə influenserlərlə qarşılıqlı əlaqədə olmaq üçün sosial mediadan istifadə edə bilərsiniz.
Kontent hazırlamaq və auditoriya toplamaq müəyyən vaxt ala bilər. Buna görə də sosial media fəaliyyətinizi ümumi inkişaf istiqamətinizlə bərabər yönəltməlisiniz.
Sosial mediadan öz biznesinizin uğurlu olması üçün istifadə etməyin ən yaxşı yollarından biri markanızın Facebook qrupunu yaratmaqdır. Burada auditoriyanız sizin markanızdan xəbər tutacaq. Markanızdan xəbəri olmayanların qrupda paylaşılan kontentlər sayəsində sizi tanıması şansı yüksəkdir. Belə qrupların auditoriyası məhsulunuzun potensial alıcılarıdır. Growth hacker isə hər gün paylaşımlar edərək onları alışa həvəsləndirir.
#8 Ən böyük rəqiblərinizi izləyin
Ölçü və formasından asılı olmayaraq, rəqabət həmişə mövcud olub, olacaq da. Öz rəqabət sahənizi müəyyənləşdirdikdən sonra şirkətinizin hər hansı bazarda niyə üstün olduğunu göstərməyiniz vacibdir.
Sahibkar olaraq təkcə biznesinizə diqqəti çəkmək kifayət etmir. Siz həm də rəqabət sahənizdə dəyişən faktorlardan da xəbər tutmalısınız. Bu, biznesinizi daha çevik və daha güclü edəcək.
Bir çox bizneslər fəaliyyət planları olmadan rəqabətə girir, daha sonra gözləntiləri doğrulda bilmir, ən axırda isə iflas edirlər.
Hədəf marka ətrafında baş verən bütün söhbətlərdən vaxtında xəbər tutmaq üçün hədəf auditoriyanızın yerləşdiyi eyni rəqəmsal məkanlarda (sosial media, forumlar və s.) siz də olmalısınız. Bu, yaxşı planlaşdırma deməkdir.
Planınıza həmçinin rəqibin saytının (həmçinin həmin saytdakı açar sözləri) ətraflı və daimi təhlilini daxil etməlisiz ki, kontentinizi maksimum dərəcədə təsiredici hazırlaya biləsiz. Eyni zamanda onların məhsul və xidmətlərini necə təqdim etdiyi barədə anlayışınızın olması üçün verdikləri istinadları (backlink) da izləməlisiniz. Bunun üçün Semrush-dan istifadə etməyi məsləhət görürəm.
#9 Ciddi kontent marketinq strategiyası yaradın
Biznesiniz üçün müştəridən gələn reaksiyalar çox vacibdir. Bu reaksiyalar sizə şikayətləri və sorğuları tez bir zamanda həll etməyə, narazı müştəriləri yola gətirməyə kömək edəcək.
Səmərəli inkişaf üzrə marketinq strategiyalarının əsasını ciddi kontent marketinq strategiyası təşkil edir. O, sizə müştəri reaksiyasına fokuslanmağa və məhsulunuzu asanlıqla satışa çıxarmağa kömək edəcək.
Az bir büdcə ilə öz biznesiniz üçün kontent marketinq strategiyası yaradın. Bu kontent marketinq strategiyası sayəsində auditoriya məhsulunuzun dəyərini başa düşəcək. Hansı biznesdə olmağınızdan asılı olmayaraq, kontent marketinq strategiyanız hər zaman düzgün auditoriyanı cəlb etməyə hədəflənməlidir.
Kontent marketinq kampaniyalarını planladıqda həmişə paylaşıla bilən kontent yaratmağa çalışın. Məsələn, video kontent bir çox kontent marketinq kampaniyalarının əsas sütununa çevrilib. Çünki video kontent auditoriyaya yığcam şəkildə bir çox məlumatı ötürməyə imkan verir.
Marketo kimi məşhur marketinq avtomatlaşdırma aləti text formatında olan ənənəvi maarifləndirici məqalələri video ilə əvəzləyir.
Bu, kontent yaradıcıları üçün çətin bir sınaqdır. Yaxşı xəbər isə odur ki, komandanızın böyük-kiçikliyindən və ya resurslarınızın həcmindən asılı olmayaraq, siz kontentinizə emosiyalar, dəyər və əlbəttə ki, unikallıq əlavə edərək çox paylaşılan kontent yarada və potensial müştəriləri öz saytınıza cəlb edə bilərsiniz.
#10 Qonaq kimi paylaşımlar edin
Qonaq kimi paylaşımlar etmək (Guest posting) əlaqələr qurmağa kömək edir. Internetdə xeyli sayda Guest posting xidmətləri mövcuddur. Demək olar ki, hamısının da öz vebsaytları var. Bu xidmət provayderləri saytınıza linklər verməklə təbii yolla ziyarətçiləri cəlb edir və axtarış sistemlərində reytinqinizi yüksəldir.
Guest posting çox yaxşı bir marketinq growth hack-idir. Bloqçular təbii yolla veb sayt trafiki qazanmaq, axtarış sistemlərində yüksək reytinqlər əldə etmək məqsədilə bu üsuldan çox istifadə edirlər.
Buffer Growth hack-lər arasında qonaq kimi paylaşımlar etməyi seçən markalardan biridir. Başladıqları ilk vaxtlarda onlar nüfuzlu bloqçulardan paylaşılabilən kontent yaratmağı istəmiş, sonra isə yaxşı Domen nüfuzu (DA) olan saytlardan bu kontentlərə çoxlu sayda istinadlar vermişdilər.
#11 İnfluenserlərlə birgə çalışın
Markanın yaradılmasına gəldikdə, markaların niyə influenserlərə tanıtım üçün pul ödəmələri səbəbsiz deyil. Daha geniş auditoriyaya səsinizi çatdırmaq üçün tanınmış influenserlərlə əməkdaşlıq etmək lazımdır. Qeyd edim ki, təsir dairəsi ən güclü olan influenserlər 50.000+ izləyicisi olanlardır.
Sahibkarlar öz məhsul və xidmətlərini təbliğ etmək üçün influenserlərlə əməkdaşlıq etməlidirlər. Düzgün qurulduğu halda influenser marketinqi istənilən biznesi yaxşı təbliğ edə və məhsulun geniş kütləyə çatmasına kömək ola bilər.
Marketinq büdcəsinin azlığına görə böyük markalarla rəqabətə girə bilməyən yeni startaplar üçün influenserin nüfuzundan istifadə etmək əla bir marketinq growth hack-idir. Influenserlərin yaxşı izləyici kütləsi olduğuna görə bizneslər onların potensial müştəri bazalarından istifadə edə bilir. Məsələn, tanınmış marka olan Gymshark özünü təbliğ etmək və satışlarını artırmaq məqsədilə influenserlərlə işləyirdi. Faktiki olaraq, başladığı ilk vaxtlarda Gymshark markasını tanıtmaq və müştəri cəlb etmək məqsədilə ağırlıqqaldırma və fitnes sahələrindəki influenserlerdən çox asılı idi.
İnfluencer marketinqi üçün sizə Shoutcart-dan istifadə etməyi məsləhət görürəm. 5 dəqiqə içində istədiyiniz influenseri səbətə əlavə edib, reklamınızı onlara paylaşdıra bilərsiniz.
Şəkildən də gördüyünüz kimi reklamınızı kateqoriya üzrə istər toplu formada 10-20 bloggerə birdən, istərsə də tək-tək seçib verə bilərsiniz. Platformanın ən gözəl xüsusiyyəti isə Tik-Tok-da reklam verə bilmək özəlliyidir.
Sifarişi verdikdən sonra influenserlər sifarişi qəbul edib təyin etdiyiniz vaxtda paylaşımı edirlər. Mən özüm bu platformadan mütəmadi olaraq istifadə edirəm və bəzən Shoutcart qiymətləri influenserlərin öz qiymətlərindən daha ucuz olur.
#12 Trendə uyğun hərəkət edin
Bir tərəfdən müştəri xidməti, büdcəni izləmə, marketinq, satış, məhsulun inkişafı işləri, digər tərəfdən isə sahə üzrə ən son irəliləyişlər və innovasiyaları izləməklə məşğul olmaq çox çətin ola bilər. Amma biznesinizin uğurlu olmasının açarı trendləri hər zaman izləməkdir.
Trendləri erkən təyin etmək sizə səmərəli kampaniya ideyaları təklif etməyə və ya yeni trendlərə uyğun hərəkət etmək üçün biznes planlarını dəyişməyə imkan verir. Siz ən son trendlərdən xəbərdar olaraq daha sürətli nəticələr əldə edə bilərsiniz.
#13 KİV imkanlarından yararlanmaq üçün HARO-dan istifadə edin
Ən yaxşı Growth hack-lərdən biri öz peşəkar bacarığınızı göstərə biləcəyiniz HARO (Helping A Reporter Out) platformasından istifadə etməkdir. O, markanı təbliğ etmək məkanı deyil, jurnalistlərin sorğularını oxumaq üçün platformadır. Bu sorğular sizin sahənizə aid ola da bilər, olmaya da. Məsələn, hansısa jurnalist elektron ticarət saytı ilə bağlı yazmaq istəyir və HARO vasitəsilə sorğu göndərir, mən isə onlara öz Press-relizimi verirəm ki, yaysınlar.
Bəli, burada vaxtınız çox gedə bilər, amma düzgün çalışsanız buna dəyəcək. Əgər HARO-nun xəbər bülletenlərini oxumağa 30 saniyə olmaqla gündə 3 dəfə vaxt tapsanız, bunu biznesinizə ən lazımlı yatırım kimi hesab edə bilərsiniz.
Bundan başqa, yadda saxlamalısız ki, jurnalistlər nə istədiklərini dəqiq bilirlər. Buna görə də istəmədikləri ideyaları onlara təklif etməyin.
#14 Müştərilərinizə hədiyyələr göndərin
Üzərində şirkətinizin loqosu və adı olan markanıza məxsus hədiyyə məhsulları istifadəçi üçün əhəmiyyət kəsb edir.
Belə məhsullar markanızı təbliğ edir, müsbət rəy yaratmağa kömək edir və müştərilərinizi sadiqləşdirir. Razı müştəri markanızın təbliğatçısına çevrilir, sizin markanız isə daha çox tövsiyə olunur və siz daha çox müştəri qazanırsınız.
3. Əlavə Growth Hack strategiyaları
#15 Beta Tester-lərə endirim verin
#16 Quora-da sahəniz üzrə suallara cavab verin
#17 Affiliate Marketinqi biznesinizə tətbiq edin
#18 E-mail vasitəsilə kampaniyalarınızı yayın
#19 Mövcud kontentinizi zamanın nəbzinə uyğun yeniləyin
4. Growth hacking-ə aid 3 ən yaxşı nümunə
Facebook dünyanın ən sevimli sosial media platformasıdır və şübhəsiz ki, bu günki rəqəmsal aləmdə Growth hacking üçün ən yaxşı nümunələrdən biridir. 2 milyarddan artıq istifadəçisi olan Facebook bizim həyatımızın bir parçasına çevrilib. Quora-da Facebook-un growth hack-lərinə aid verilən suallardan birində bu sosial media dahisinin öz miqyasını genişləndirməsi üçün istifadə etdiyi 2 effektiv texnikadan danışılır.
Birincisi, onlar insanları həvəsləndirdi ki, yalnız dostlarını və ailə üzvlərini əlavə etsinlər və öz çevrələri daxilində kontent paylaşsınlar. İkincisi, Facebook həmin dostların və ailə üzvlərinin də platformada hesab yaratmaları üçün onlara dəvət e-mail-ləri göndərdi.
İnsanlara maraqlı gəlirdi ki, görəsən onları Facebook-da kim işarələyib, onlar haqqında Facebook-da nə danışılır və onlar qeydiyyatdan keçdikdən sonra nə əldə edəcəklər. Beləliklə də Facebook-un üzvünə çevrilməyə başladılar.
PayPal
Ən yaxşı growth hack-lərdən istifadə edən digər bir biznes Paypal-dir. Haçansa düşünmüsüz ki, pul paylamaq şirkətinizi böyüdə bilər? Bu ideya PayPal üçün möcüzələr yaratdı.
Onların growth hacking strategiyası tövsiyə proqramından istifadə etmək idi. PayPal tövsiyə proqramı vasitəsilə daha çox istifadəçi gətirən istifadəçiləri stimullaşdırmağa başladı. Nəticədə, PayPal biznesi gündəlik olaraq 7%-dən 10%-ə doğru böyüməyə başladı. Stimullaşdırıcı kampaniyanın ümumi məbləği təqribən 60 milyon dollara çatmışdı.
Onların istifadə etdiyi growth hack-lər barədə ən maraqlısı o idi ki, həmin dövrdə sosial media indiki kimi güclü deyildi. Buna görə də PayPal əsasən şifahi şəkildə, SMS, bloqlar və e-mail-lər vasitəsilə böyüdü.
Dollar Shave Club
Video kontent hazırda ən tələbatlı dövrünü yaşayır. Dollar Shave Club-ın bu growth hack nümunəsi video marketinqin necə effektiv olduğunu və düzgün video kontent ilə necə asanlıqla istədiyiniz qədər müştəri qazana biləcəyinizi sübut edir. Business Insider-in məlumatına görə Dollar Shave Club aşağıdakı growth hack-dən istifadə edərək 20 milyon dollardan çox qazanc əldə edib.
Dollar Shave Club xidmətlərini təbliğ etmək məqsədilə bir video hazırladı və öz müştərilərinə hər ay cəmi 1 $-a yeni ülgüclər göndərməyə başladı. Video viral-a çevrildi, qısa müddət ərzində 19 milyon baxış qazandı.
Son söz
İnkişaf etmək məqsədilə bir çox bizneslər həmişə çətin sınaqlardan keçiblər. Reallıq budur ki, sizin bazarınız və hədəf auditoriyanız müntəzəm olaraq kreativ marketinq kampaniyaları ilə rastlaşmır.
Bizneslər artıq sınaqdan çıxmış growth hack-lərə fokuslanmalıdırlar. Elə unikal bir growth hack yoxdur ki, bütün problemləri birdən həll etsin. Belə bir rəqabətli mühitdə biznesinizi böyütmək üçün yuxarıda qeyd etdiyim growth hacking strategiyalarından istifadə etməlisiniz.
Bundan başqa, bütün ekspertlər həm də zərəri toxunmayacaq yeni üsulları da yoxlamağı məsləhət görür.
Son şərhlər